پڕۆژەی ڕووناکی تا ئێستا 180 هەزار هاوبەش لە داشکاندنی قەرزی کارەبا سوودمەند بوون و داهاتەکەی 420 ملیار دینار بووە

پڕۆژەی ڕووناکی ئاشکرایکرد کە تا ئێستا ١٨٠ هەزار هاوبەش لە داشکاندنی قەرزی کارەبا سوودمەند بوون و داهاتەکەی زیاتر لە ٤٢٠ ملیار دینار بووە، و ئاماژەی بەوەش کرد کە لێخۆشبوونی قەرزی کارەبا تا دوو ڕۆژی تر بەردەوام دەبێت. وردەکاریی لێخۆشبوون لە قەرزی کۆنی کارەبا پڕۆژەی ڕووناکی بڵاویکردەوە، لە دوو قۆناغی لێخۆشبووندا بە گشتی زیاتر لە ٣٥٠ ملیار دینار لێخۆشبوون بۆ ئەو هاوبەشانە کراوە کە قەرزی کۆنی کارەبای پێش پڕۆژەی ڕووناکییان لەسەر بووە. ئاماژەی بەوەش کرد، تا ئێستا ١٨٠ هەزار هاوبەش لە لێخۆشبوونی قەرزی کۆنی کارەبا بە ڕێژەی ٥٠٪ سوودمەند بوون و ٧٢ هەزار هاوبەشی دیکەیش ماون قەرزەکانیان بگەڕێننەوە. پڕۆژەی ڕووناکی ئەوەشی خستەڕوو کە داهاتەکەی زیاتر لە ٤٢٠ ملیار دینار بووە و ئێستا ٦٠٪ـی هاوبەشانی ماڵان هیچ قەرزێکی پێش پڕۆژەی ڕووناکییان لەسەر نییە؛ هاوکات ٤٠٪ـی هاوبەشان قەرزی کۆنی کارەبایان لەسەر ماوە کە نیوەیان قەرزەکەیان کەمترە لە ٢٠٠ هەزار دینار. جێگەی ئاماژەیە، لێخۆشبوونی قەرزی کارەبا تا دوو ڕۆژی تر بەردەوام دەبێت و لە ١٩ی ئەم مانگەوە (تشرینی یەکەمی ٢٠٢٦) قەرزی هاوبەشانی کارەبا ڕاستەوخۆ دەگۆڕێت بۆ قیستی مانگانە. ی.س

وەزارەتی خوێندنی باڵا بڕیاریدا داشکاندن لە کرێی خوێندن بە ڕێژەی (٤٥%) بۆ سەرجەم قۆناغەکانی خوێندنی بەرایی (پارالێڵ و ئێواران) خوێندنی باڵا (دبلۆمی باڵا، ماستەر، دکتۆرا) لە زانکۆکانی هەرێمی کوردستان بۆ ساڵی خوێندنی (٢٠٢٦-٢٠٢٧) بەردەوام بێت

بەپێی نووسراوێکی وەزارەتی خوێندنی باڵا کە ئەمڕۆ ٢٠٢٦/١٠/١٤، بە واژۆی د.ئارام محەمەد قادر دەرچووە. ​پاڵپشت بە هێڵە گشتییەکانی بەرنامەی کاری کابینەی نۆیەی حکومەتی هەرێمی کوردستان، ئاماژە و پاڵپشت بە کۆنووسی کۆبوونەوەی ئەنجومەنی وەزارەتی خوێندنی باڵا و توێژینەوەی زانستی، ژمارە (٥)ی ساڵی (٢٠١٩) کە لە ڕێکەوتی (٢٠١٩/١٠/١) و (٢٠١٩/١٠/١٦) ئەنجامدرا، تەوەرەی یەکەم (ڕێنمایی و ڕاسپاردەکانی بەڕێز جەنابی وەزیر) بڕگەی یەکەم، تایبەت بە پرسی کرێی خوێندنی (پارالێل و ئێواران) بەپێی ئەو دەسەڵاتەی کە پێمان دراوە، بڕیاردرا بە: ​داشکاندن لە کرێی خوێندن بە ڕێژەی (٤٥%) بۆ سەرجەم قۆناغەکانی خوێندنی بەڕایی (پارالێل و ئێواران) خوێندنی باڵا (دبلۆمی باڵا، ماستەر، دکتۆرا) لە زانکۆکانی هەرێمی کوردستان بۆ ساڵی خوێندنی (٢٠٢٦-٢٠٢٧). ی.س

خشتەی دابەشکردنی مووچەی مانگی نۆ

وەزارەتی دارایی و ئابووری ڕایگەیاند ڕۆژی یەکشەممە ڕێکەوتی ( ١١ ی تشرینی یەکەمی ٢٠٢٦ ) دەست بەدابەشکردنی مووچەی مانگی ئەیلوولی فەرمانبەران و مووچەخۆرانی هەرێمی کوردستان دەکرێت و ڕۆژی چوار شەممە ( ١٤ ی تشرینی یەکەمی ٢٠٢٦ ) کۆتاییب ەدابەشکردنی مووچە دێت. و

مووچەی مانگی ئەیلول خرایە سەر هەژماری بانکی وەزارەتی دارایی ئابووری

وەزارەتی دارایی و ئابووری ڕایگەیاند ئەمڕۆ پێنجشەممە 2026/10/8 بڕی ( ٨٣٥،٥٥٣،٠٠٠،٠٠٠) هەشت سەدو سی و پێنج ملیارو پێنج سەدو پەنجاو و سێ ملیۆن دینار وەک تەمویلی مووچەی مانگی ئەیلوولی فەرمانبەران و مووچەخۆرانی هەرێمی کوردستان خرایە سەر هەژماری بانکی وەزارەتی دارایی و ئابووری هەرێمی کوردستان لە لقی هەولێری بانکی ناوەندی عێراق. هاوشێوەی چەند مانگی ڕابردوو وەزارەتی دارایی فیدراڵ بڕی ( ١٢٠،٠٠٠،٠٠٠،٠٠٠ ) سەدو بیست ملیار دیناری وەک پشکی گەنجینەی فیدراڵی لە داهاتی نانەوتی هەرێم بۆ مانگی ئەیلول لە کۆی تەمویلی مووچە بڕیوە. هەروەها بڕی ( ٤،٩٦١،٠٠٠،٠٠٠ ) چوار ملیارو نۆسەد وشەست ویەک ملیۆن دیناری لە تەمویلی مووچەی مانگی ئەیلول نەناردووە کە بریتییە لە شایستەی مووچەی مانگەکانی ڕابردووی خانەنشینانی شارستانی و سەربازی.

شارەوانی زەڕایەن لیژنەی فریاگوزاریی پێکهێنا

سەرۆکایەتی شارەوانی زەڕایەن بڵاویکردەوە ئەمڕۆ پێنجشەممە 2026/10/8 بەسەرپەرشتی بەڕێز سەرۆکی شارەوانی کۆبونەوەیەک ئەنجامدرا بەمەبەستی ئامادەکاریی بۆ وەرزی باران بارین و ڕووبەڕووبوونەوەی کارەساتی سروشتی، بۆ ئەم مەبەستە لیژنەیەکی فریاگوزاری پێکهێنرا لەنێوان هۆبەکانی (ئامێرەکان ، چاکسازی ، باخچەکان) کە ئەم تیمە ئێشکگری بەردەوامیان هەیە. لەکاتی پشوەکانیش بە هەماهەنگی لەگەڵ دامودەزگاکانی تری پەیوەندیدار لەسنوری شارەوانی زەڕایەن. ی.س

بۆ ئەمساڵى خوێندن (39052) دەرچوى ئامادەیى لە زانکۆ حکومیەکان وەرگیراون .

ئەمڕۆ یەکشەممە ڕێکەوتى (‏4‏/10‏/2026) لە میانەى کۆنگرەیەکى ڕۆژنامەیدا، کە لە هۆڵى ڤیدیۆ کۆنفرانس لە دیوانى وەزارەتى خوێندنى باڵا و توێژینەوەى زانستى بەڕێوەچوو، د. ئارام محمەد قادر وەزیرى خوێندنى باڵا و توێژینەوەى زانستى بەیاوەری د. ئەمیر چالی بریکاری وەزارەت ئەنجامى وەرگرتنى قوتابیان و خوێندکارانى لە زانکۆ و پەیمانگە حکومیەکان ئاشکرا کرد، لەو چوارچێوەیەدا و لەسەرەتاى کۆنگرە ڕۆژنامەوانیەکەدا، د.ئارام محەمەد قادر وەزیرى خوێندنى باڵا و توێژینەوەى زانستى دواى پیرۆزبایکردن لە دەرچوانى دوانزەى ئامادەیی و خێزان و کەسوکاریان، سوپاسى زانکۆکان و ستافى وەزارەتى خوێندنى باڵا و توێژینەوەى زانستى کرد، کە بەردەوام هەماهەنگ و هاوکارى وەزارەت بون، وتیشى لە ماوەى ئەم حەوت ساڵەدا بەردەوام کارمان کردوە بۆ ئەوەى زۆرترین دەرفەت بۆ کچان و کوڕانى خۆمان لە ناوەوەى وڵات بڕخسێنین و بەخۆڕایی درێژە بەخوێندن بدەن. وەزیرى خوێندنى باڵا و توێژینەوەى زانستى بەشێکى دیکەى کۆنگرە ڕۆژنامەوانیەکەى تەرخانکرد بۆ وەرگرتنى دەرچوانى پۆلى دوازدە لە زانکۆ و پەیمانگەکان، بۆ ئەوەش ڕایگەیاند: هاوشێوەى ساڵانى ڕابردو، خۆشبەختانە ئەمساڵیش توانیمان سەرجەم دەرچوانى قۆناغى دوازدەی ئامادەیی لە زانکۆ و پەیمانگە حکومیەکانى هەرێمى کوردستان وەربگرین. - بۆ ئەمساڵى خوێندن (39052) دەرچوى ئامادەییەکان لە زانکۆ حکومیەکان وەرگیراون ... لە بەشێکى دیکەى کۆنگرە ڕۆژنامەوانیەکەدا، د.خەتاب ئەحمەد شێخانى باسى لە وردەکارى وەرگرتنى دەرچوانى دوازدەى ئامادەیى کرد، بۆ ئەوەش سەرەتا وتى: سوپاسى وەزارەتى پەروەردەو بەتایبەت بەڕێوەبەرایەتى گشتى ئەزمونەکان دەکەم، کە بەردەوام هاوکار و هەماهەنگى وەزارەتى خوێندنى باڵا و توێژینەوەى زانستى بون بەتایبەت لە پرۆسەى گواستنەوەى داتاکانى دەرچوانى دوازدەى ئامادەیی، هەروەک سوپاسى وەزیرى خوێندنى باڵا و توێژینەوەى زانستى دەکەم، کە پاڵشپت و پشتگیرى بەردەوامى کارەکانمان بوو و پیداگرى بەڕێزیان وایکرد، توانیان دەرفەتى خوێندن بۆ سەرجەم دەرچوانن بڕخسێنن. لە بەشێکى دیکەى قسەکانیدا باسى لە وردەکارى داتاکان کرد و بۆ ئەوەش وتى: پلانى گشتى وەرگرتن لە زانکۆ و پەیمانگەکان بۆ ساڵى خوێندنى (2026-2027) بریتى بوو لە (65324)، هاوکات کۆى گشتى ژمارەى دەرچوانى پۆلى دوانزەى ئامادەیی بریتى بو لە (40716) دەرچو، لەو ژمارەیەدا (39950) دەرچویان فۆرمى زانکۆلاینیان پڕکردەوە، هاوکات (32739) پێشکەشکار لە دەرچووانی ساڵی (2026) فۆرمیان پڕکردەوە، لەگەڵ (7211) پێشکەشکار لەدەرچووانی ساڵانی ڕابردوو، لە ئەنجامدا (39054)یان وەرگیران، بەشێوەیەک وەرگیراوی دەرچوانی ئەمساڵ بریتى لە (32422) و، وەرگیراوانی ساڵانی ڕابردووش بریتیە لە (6630) پێشکەشکار، بەڕێوەبەرى گشتى فەرمانگەى خوێندن و پلان و بەدواداچون ئەوەشى ڕاگەیاند لە ئێستادا (27391) کورسى خوێندن بە بەتاڵى ماوەتەوە. لە بەشێکى دیکەى قسەکانیدا، د.خەتاب شێخانى بەڕێوەبەرى گشتى فەرمانگەى خوێندن و پلاندان و بەدواداچون ڕایگەیاند: بۆ ئەمساڵى خوێندنیش وەک ساڵانى زۆرترین ڕێژەى دەرچوانى قۆناغى دوازدەى ئامادەیمان لە زانکۆ و پەیمانگە حکومیەکانى هەرێمى کوردستان وەرگرت، تەنها ژمارەیەکى کەم لە پێشکەشکاران نەبێت، کە ژمارەیان تەنها (٣١٧) خوێندکارە، کە بەهۆى هەڵە لە پڕکردنەوەى فۆرمەکانیان ناویان نەهاتۆتەوە، ئەوانیش بەپێى نمرەکانیان لە بەشە شایستەکان جێگەیان دەکرێتەوە، بەوەش ڕێژەى وەرگرتن دەبێتە (100 %)، کە ئەوەش بریتیە لە سود وەرگرتن لەوپەڕى تواناى زانکۆکانمان، بۆ ئەوەش سوپاسى تەواوى سەرۆک زانکۆ و مامۆستایانى بەشە جیاکانى کرد، کە هاوکار و پشتیوانى وەزارەت بوون. - ژمارەى وەرگیراوانى ئامادەیی پیشەییەکان گەیشتە (716) دەرچوو ... لە بەشێکى دیکەى کۆنگرە ڕۆژنامەیەکەیدا، بەڕێوەبەرى گشتى فەرمانگەى خوێندن و پلان و بەدواداچون باسى لە دەرچوانى خوێندنگە پیشەییەکان کرد و، بۆ ئەوەش ڕایگەیاند: ئەمساڵیش دەرچوانى خوێندنگە پیشەییەکان ڕاستەوخۆ لەگەڵ دەرچوانى ئامادەیی شوێنى وەرگرتنیان ڕادەگەێندرێت، وتیشى ژمارەى دەرچووى ئامادەییە پیشەییەکانى ئەمساڵ و ساڵانى پێشوو بریتى بوو لە (901) دەرچوى پیشەیی، لە ئەنجامدا (716)یان وەرگیران و (185)ى دیکەیان وەرنەگیران، هاوکات (493) دەرچوى پیشەیی فۆرمى داواکاریان پێشکەش نەکرد. هاوکات بەڕێوەبەرى گشتى فەرمانگەى خوێندن و پلاندانان وتیشى؛ (376) دەرچوى خوێندنگە نێودەوڵەتییەکان داواکارییان بۆ وەرگرتن لە زانکۆ و پەیمانگە حکومییەکانى هەرێمى کوردستان پێشکەشکردوەو لە ئەنجامدا (370) دەرچوى ئامادەیی خوێندنگە نێودەوڵەتییەکان وەرگیران. هەروەها بەڕێوەبەرى گشتى فەرمانگەى خوێندن و پلاندانان وتیشى؛ (2700) دەرچوى دوانزەى ئامادەیی خوێندنگە کوردییەکانى ناوچەکانى دەرەوەى ئیدارەى هەرێمى کوردستان لە زانکۆ و پەیمانگە حکومییەکانى هەرێمى کوردستان لە چەند رۆژى داهاتودا دەرگاى پێشکەشکردنیان بۆ دەکرێتەوە. - وەرگیراوان دەتوانن لە ڕێگەى (https://www.regayzanko.com/ ) شوێنى وەرگرتنیان بدۆزنەوە ... لە بەشێکى دیکەى کۆنگرە ڕۆژنامەوانیەکەدا، بەڕێوەبەرى ناوەندى وەرگرتن باسى لە چۆنیەتى پێشکەشکردنى سکاڵا لە ڕێگەى زانکۆلاین کرد و، ڕاشیگەیاند لە ئێستاوە دەرچوان دەتوانن لە ڕێگەى (https://www.regayzanko.com/ ) دەتوانن بەهەمان پاسۆرد و یزەرنەیمى تایبەت بەخۆیان شوێنى وەرگرتنیان بدۆزنەوە، ئەوانەشى وەرنەگیراون دەتوانن لەو بەشانەى دێتە بەردەستیان دەتوانن بەشێک دیارى بکەن تا لە پرۆسەى وەرگرتن بێبەش نەبن ی.س

ئەنجامی زانکۆلاینی تایبەت بە وەرگرتنی لە زانکۆ و پەیمانگاکان بڵاوکرایەوە

ئەمڕۆ یەکشەممە 2026/10/4، وەزارەتی خوێندنی باڵا ئەنجامی زانکۆلاینی تایبەت بە وەرگرتنی لە زانکۆ و پەیمانگاکان بڵاوکردەوە کۆی گشتیی پلانی وەرگرتنی قوتابیان بۆ زانکۆ و پەیمانگاکان بۆ ئەمساڵ، 65324 قوتابی بووە، کۆی گشتیی پێشکەشکاران 39950 قوتابی بووە و 39052 قوتابی وەرگیراون، 27391 کورسییش بە بەتاڵی ماونەتەوە.