د.ئارام محمد قادر وەزیرى خوێندى باڵا و توێژینەوەى زانستى ڕایگەیاند: بۆ ئەمساڵى خوێندنیش وەک ساڵانى ڕابردو (١٠٠%) دەرچوانى قۆناغى دوانزەى ئامادەیمان لە زانکۆ و پەیمانگە حکومیەکانى هەرێمى کوردستان وەرگرت.
ئەو ڕاگەیاندنەى وەزیرى خوێندنى باڵا و توێژینەوەى زانستى، ئەمڕۆ چوارشەممە ڕێکەوتى (2022/10/12) لە میانەى کۆنگرەیەکى ڕۆژنامەیدا هات، کە بۆ ڕاگەیاندنى ئەنجامى وەرگرتنى قوتابیان و خوێندکاران لە زانکۆ و پەیمانگەکان ڕێکخرابو.
لەسەرەتاى کۆنگرە ڕۆژنامەوانیەکەدا، د.ئارام محمد قادر دواى پیرۆزبایکردن لە دەرچوانى دوانزەى ئامادەیی و کەسوکاریان، سوپاسى وەزارەتى پەروەردەى کرد، کە بەردەوام هاوکار و هەماهەنگى وەزارەتى خوێندنى باڵا و توێژینەوەى زانستى بون بەتایبەت لە پرۆسەى گواستنەوەى داتاکانى دەرچوانى دوازدەى ئامادەیی، هەروەک سوپاسى فەرمانگەى خوێندن و پلاندانان و بەدواداچون و ناوەندى وەرگرتنى کرد، کە لە ماوەى ڕابردودا هەموان پێکەوە شەو و ڕۆژیان خستەسەر یەک بۆ ئەوەى کار لەسەر پلانێکى تۆکمە بکەن، بەشێوەیەک زۆرترین دەرفەت بۆ دەرچوانى پۆلى دوانزەى ئامادەیی بڕخسێنن تا ڕۆڵەکانى وڵاتەکەمان لە زانکۆکانى خۆمان بتوانن درێژە بەخوێندنى زانکۆیی بدەن، هەر لەو چوارچێوەیەشدا توانرا (63,219) کورسى خوێندن بۆ ئەمساڵى خوێندن تەرخان بکەین، کە بەراورد بەساڵى ڕابردو (6,415) کورسى خوێندن زیاترە.
لە بەشێکى دیکەى قسەکانیدا، د.ئارام محمد قادر ڕایگەیاند: بۆ ئەمساڵى خوێندنیش وەک ساڵانى ڕابردو (١٠٠%) دەرچوانى قۆناغى دوانزەى ئامادەیمان لە زانکۆ و پەیمانگە حکومیەکانى هەرێمى کوردستان وەرگرت، تەنها ژمارەیەکى کەم لە پێشکەشکاران کە ژمارەیان تەنها (368) خوێندکارە، بەهۆى هەڵە لە پڕکردنەوەى فۆرمەکانیان ناویان نەهاتۆتەوە، ئەوانیش لە ڕێگەى فۆرمى سکاڵا دواتر بەپێى نمرەکانیان لە بەشە شایستەکان جێگەیان دەکرێتەوە، ئەوەشى ڕاگەیاند: دواى تەواوبونى پرۆسەکە لە ئێستادا (22,000) هەزار کورسى بەتاڵ ماوەتەوە، کە ئەوەش بریتیە لە سود وەرگرتن لەوپەڕى تواناى زانکۆکانمان، بۆ ئەوەش سوپاسى تەواوى سەرۆک زانکۆ و مامۆستایانى بەشە جیاکانى کرد، کە هاوکار و پشتیوانى وەزارەتە بون.
لە بەشێکى دیکەى کۆنگرە ڕۆژنامەوانیەکەدا، د.خەتاب ئەحمەد مستەفا بەڕێوەبەرى گشتى خوێندن و پلان و بەدواداچون لە وەزارەتى خوێندنى باڵا باسى لە وردەکارى وەرگرتنى دەرچوانى دوانزەى ئامادەیى کرد، کە ئەوەش بەم شێوەیە بو:
کۆی گشتی دەرچوان: 38680
دەرچوانی زانستی: 25972
دەرچوانی وێژەیی: 12708
کۆی گشتی پلانی وەرگرتن: 63219
پێشکەشکار لە دەرچوانی ساڵی ٢٠٢٢: 27728
پێشکەشکار لە دەرچوانی ساڵی ٢٠٢١: 9354
پێشکەشکار لەدەرچوانی ساڵانی ڕابردو: 7326
کۆی پێشکەشکاران: 44408
کۆی گشتی وەرگیراوان: 41253
وەرگیراوی دەرچوانی ئەمساڵ: 27360
لە بەشێکى دیکەى کۆنگرە ڕۆژنامەوانیەکەدا، ئارام ئیراهیم بەڕێوەبەرى ناوەندى وەرگرتن باسى لە چۆنیەتى پێشکەشکردنى سکاڵا کرد کە لە ڕێگەى وێبسایتى (Regayzanko.com) ئەنجام دەدرێت، بەوەڵامدانەوەى پرسیارى پەیامنێرانکۆتایی بەکۆنگرە ڕۆژنامەوانیەکە هات.
ب?اوکردن?و?
